Буга чейин, тагыраагы, 26-ноябрь күнү Жалал-Абад шаарынын 36 жаштагы тургуну милицияга аялы жок болуп жаткандыгын айтып, арыз менен кайрылган. Анда 2020-жылдын 25-ноябрь күнү саат 15:30 чамасында 42 жаштагы жубайы Бахтигүл Базарматова Жалал-Абад шаарынан кызы менен коштошуп, үйүн көздөй кеткен боюнча келбегендигин айткан.
Бул маалымат коомчулукта резонанс жаратып, дайынсыз болуп жаткан аялды табуу максатында Жалал-Абад ОИИБдин жетекчилигинин көзөмөлү астында тиешелүү иш-чаралар уюштурулган.
Облустук милиция шектүүнү кармап, окуя болгон жерге, тагыраагы, аялдын сөөгүн көмгөн жерге алып барганда алардын бири эмне кылышкандыгын баяндаган. Бул боюнча тартип коргоо органдары видео таратты.
Анда шектүүнүн бири маркумду кантип алып келгендигин айтып берип жатат.
"Ш (экинчи шектүүнүн аты – ред.)... менен бирге түшүрдүк (сөөктү – ред.) да бул жакка койдук. Ш. машинаны минип, өйдө чыкты. Мен үстүнө (сөөккө – ред.) матрацты койдум. Максатым жок эле, коркуталы дегенбиз...", — деп айтып берип жатканын көрүүгө болот.
Милиция кызматкеринин ошол убакта жабырлануучунун абалы кандай эле деген суроосуна анын "эже кыймылдабай калыптыр" деген жообун да угууга болот.
Тергөөнүн маалыматтарына караганда, эки шектүү 25-ноябрь күнү сыртынан тааныган Базарматова менен жолугуп, Жалал-Абад шаарынын Ленин — Нагима Айтматова көчөлөрүнүн кесилишинен саат 16:30дар чамаларында "Тойота-Авенсис" автоунаасы менен алып кеткен. Аталган калаанын четиндеги ээн талаага алып барып акча сурашкан.
Эки шектүү жасаган кылмышын мойнуна алып, окуя кандай болгондугу тууралуу жана сөөктү көмгөн жерди көрсөтүп беришкен. Сотко чейинки өндүрүш иштин алкагында шектүүлөр Жалал-Абад ШИИБинин убактылуу кармоо абагына киргизилген.
Ал эми кылмыш реестрге катталып, сотко чейинки өндүрүш иши ачылган.