ОШ, 27-май – Sputnik. Жалал-Абад шаарында алыш күрөшү боюнча Азия чемпионун белгисиз эки киши атып кетти. Бул тууралуу облустук милициянын маалымат катчысы Нурдин Жээнтаев Sputnik Кыргызстан агенттигине билдирди.
Жалал-Абад облустук клиникалык ооруканасынан шаардык милициянын 102 кызматына 1977-жылы туулган А.С. аттуу жаран ок жеп түшкөндүгү кабарланган.
Милициянын ыкчам-тергөө тобу окуя болгон жерге барып, кароо жүргүзгөн. Аталган аймактан белгисиз травматикалык тапанчадан атылган желим октор алынып, күбөлөр суралып, тиешелүү материалдар чогултулган.
Топтолгон материалдар Жалал-Абад шаардык ички иштер башкармалыгында Кылмыштардын жана жоруктардын бирдиктүү ресстрине Жазык кодексинин 266-беренеси ("Ээнбаштык") менен катталган. Сотко чейинки өндүрүш иши ачылып, тиешелүү экспертизалар дайындалган.
Учурда аталган кылмыштын бетин ачуу максатында тергөө тапшырмасы берилип, ыкчам-иликтөө иштери жүргүзүлүп жатат.
Облустук ооруканын сынык-жаракат бөлүмүнүн башчысы Алмаз Тайланов билдиргендей, жабырлануучу денесинин алты жеринен жаракат алган. Желим ок жамбашына, белине тийген. Денесине 4-4,5 саниметрдей кирип кеткен.
«Бейтаптын абалы орто, сынык-жаракат бөлүмүндө дарыланып жатат», - деди Тайланов.
Укук коргоо органдарындагы маалымат булактары жабырлануучу С.А. алыш күрөшү боюнча Азия чемпиону жана Жалал-Абад шаардык кеңешинин депутаты Нурбек Акановдун бир тууган агасы экендигин айтышты.