Бишкек — Кара-Балта унаа жолу план боюнча быйыл ишке берилмек. Бирок учурдагы пандемияга байланыштуу, ошондой эле жол жээгиндеги түркүктөрдү которууда жакын жайгашкан кожолуктардын мүлкүнө залалы тийгендиктен ишке берүү мөөнөтү 2021-жылга жылдырылды . Бул тууралуу Кылычбек Досумбетов Sputnik Кыргызстан радиосуна маек куруп жатып билдирди.
Анын айтымында, мындан сырткары, Ош — Баткен — Исфана унаа жолунун 8-75-чакырымында курулуш иштери жүрүп жатат. Ал эми Бишкек — Ош трассасынын төртүнчү фазасына кирген Жалал-Абад — Маданият жолунун 20 чакырымга чукул жери асфальт жана бетон куюуга даяр турат.
"Өлкөдөгү ири трассалардын катарына кирген Бишкек — Кара-Балта жана Түндүк — Түштүк альтернативалуу унаа жолдорунда курулуш иштери үзгүлтүккө учураган жок. Бүгүнкү күндө ал жерлерде иш жүрүп жатат. Бирок пандемияга байланыштуу курулуш иштеринин графиги өзгөрдү. Андыктан ишти аяктоо мөөнөтү да жылып кетти. Мунун башка да себептери бар. Курулуш учурунда колдонулган оор техникалардан улам жакын жайгашкан турак жайлардын дубалынан жарака кетип, ага компенсация төлөө маселеси жаралды. Ошондой эле ал жерде көчө бойлой жайгашкан түркүктөрдү жылдыруу иштери убакытты алып жатат. Ушуга байланыштуу Бишкек — Кара-Балта унаа жолу 2021-жылы колдонууга берилет. Мындан сырткары, Кытайдан жол куруучу адистер келмек. Чек ара жабылып, алар да кечигип жатышат. Бирок бүгүнкү күндө 139 кытайлык куруучу Кыргызстанга келди. Учурда алар обсервацияда. Коңшу өлкөдөн келген адистер чыгары менен курулуш иштери тездетилет. Алар Түндүк — Түштүк альтернативалуу жолундагы туннель жана эстакаданын курулушун башташат", — деди Досумбетов.
Ал Кытайдан Түндүк — Түштүк альтернативалуу жолун курууга 450дөн ашык, Бишкек — Кара-Балта жолунун курулушуна 42 жана Бишкек — Нарын — Торугарт жолун салууга төрт адис келери пландалганын кошумчалады.
