Эксперт: НАТОнун саммитинде батыштын негизги каршылашы Кытай экени ачыкталды
Жазылуу
Эл аралык мамилелер боюнча эксперт Чынара Эсенгул Кытай Евразияда коопсуздукту камсыздоо маселесинде өзүнчө ролду ойноого белсене баштаганын белгиледи.
НАТОнун саммитинде жамааттык батыштын негизги каршылашы Кытай экени ачыкталды. Бул тууралуу Чынара Эсенгул Sputnik Кыргызстан радиосуна маек куруп жатып билдирди.
Эксперт: НАТОнун саммитинде батыштын негизги каршылашы Кытай экени ачыкталды
Анын айтымында, Советтер Союзу чачырагандан кийин дагы альянстын чыгышка кеңейиши дагы Кытайга карата жүргүзүлгөн.
"Саясий батыш деген термин колдонулууда. Бул Евробиримдик, АКШ, Япония жана алардын өнөктөштөрүнө карата айтылат. Учурда согуштук эпизод Украина менен Россияда болгону менен дүйнөлүк масштабда "саясий батыш" менен Кытайдын тирешүүсү жүрүүдө. Вильнюстагы НАТОнун саммитинде бул нерсе дагы бир жолу ачыкталды. Кытай Евразияда коопсуздук маселесинде өзүнчө ролду ойнобосо болбой турганын түшүндү. Анткени буга чейин эксперттик коомчулукта Борбор Азияда коопсуздук жаатында Россия, ал эми экономикада Кытай жооптуу деп айтылып келген. Бирок соңку геосаясий кырдаалда Кытай күч структураларынын кыймылдары ачык байкалууда. Анткени бул өлкө акыркы 7-8 жылдан бери Африка, Латын Америка, ал тургай айрым Европа өлкөлөрүнө көмөк берип, кандайдыр бир деңгээлде көз каранды кылып койгон. Башкача айтканда, Кытай өзүн аскердик держава катары көрсөтпөгөнү менен дүйнөлүк коопсуздукту камсыздоо боюнча кандайдыр бир ролду ойноого даяр. Анткени соңку жылдарда аскердик чыгым боюнча Кытай экинчи орунда болууда. Бул жерден ким ким менен тирешүүгө даярданып жатканы көрүнүп тургандай. Кошумчалай турган жагдай, НАТО СССРге каршы түзүлгөн. Бирок ал урагандан кийин бул альянс чыгышка карай кеңейүүсүн токтоткон жок. Демек, ал чыгышка, Кытайды карай жылып келе жатат", — деди Чынара Эсенгул.
Ошондой эле ал бул тиреш коммунисттер менен капиталисттердин ортосундагы идеологиялык жактан дагы салгылашуу экенин кошумчалады.
