Али Хамраев менен иштешип "дезертир" болгон Бейшеналиев. Таберик сүрөт
20:02 30.06.2023 (Жаңыртылды: 13:00 01.07.2023)
Жазылуу
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Фото / из личного архива Али Хамраева
Кыргыз элинин белгилүү актёру Болот Бейшеналиевдин сүрөтү 1972-жылы Тажикстандын Исфара шаарында тартылган.
Ал жылы атактуу кинорежиссёр Али Хамраев СССРде биринчилерден болуп вестерн жанрындагы "Жетинчи ок" көркөм тасмасын тартып, ага кыргыздын атактуу актёру катышкан.
Али Хамраев ал кезди мындайча эскерет:
"Алгач Болот Бейшеналиевди "Биринчи мугалимдеги" Дүйшөндүн ролун мыкты аткарганын көрүп, дароо жактыргам. Мага анын арык чырай келген узун бою, жаркыраган жүзү, көзү аябай жакчу. Көз карашы да бир өзгөчө болчу. "Ак илек-илек келди, жаз болду" аттуу көркөм тасмасында иштешип, жакын достордон болуп бири-бирибиздикине каттап жүрдүк. Ал жанына дайыма китеп алып жүрүп көп окучу. Кийин "Жетинчи окто" иштешип, ал дезертирдин, Сүймөнкул Чокморов отряд командиринин ролун аткарган. Эки залкар ынак достордон эле. Иш маалында экөө ат минип алып тоо аралап кайра келип калышчу. Болот чыгармачыл жолунда көптөгөн кинорежиссёрлор менен иштешип, укмуш образдарды жарата алды. Негизи кыргыз эли таланттуу уул-кыздарга бай. Муратбек Рыскулов, Советбек Жумадылов сахна менен кинодо кандай гана образдарды жаратты. Кинорежиссёрлордон Төлөмүш Океев, Болот Шамшиев, Мелис Убукеев, Геннадий Базаров менен абдан ынак элем. Бири-бирибизден жардамыбызды аячу эмеспиз. Ар түрдүү кинофестиваль жана конференцияларда жолукканыбызда кубанычыбыз койнубузга батпай кучакташып көрүшүп, каткырыгыбыз таш жарчу. Муну көргөн башка кесиптештерибиз "мына, орто азиялыктар дагы чогулду" деп суктанчу. Уялаш ага-инилердей элек", — деди Хамраев.
Советтик Түркстандагы 1917-1935-жылдардагы жарандык согушту чагылдырган "Жетинчи ок" тасмасына кыргыз, казак, өзбек, тажик улутундагы актёрлор тартылган. Аталган эмгекти Советтер Союзунда эле 22,5 миллион адам көрүп мамлекетке бир топ киреше алып келген.
Тема боюнча:
