Өндүрүштү жандандыруу үчүн кыргыз-орус жумушчу тобу түзүлдү
© Sputnik / Акбар Акжигитов
Жазылуу
Экономика жана коммерция министринин орун басары Айнура Усенбекова алгачкы отурумда кыргыз тарап өндүрүштүн бардык тармагын жандандырууга кызыкдар экенин билдиргенин айтты.
Кыргызстан менен Россиянын ортосунда түрдүү экономикалык долбоорлорду ишке ашыруу үчүн түзүлгөн жумушчу топтор эки мамлекеттин экономика министрлеринин орун басарларынын деңгээлинде иш алып барат. Бул тууралуу Айнура Усенбекова Sputnik Кыргызстан радиосуна маек куруп жатып билдирди.
Өндүрүштү жандандыруу үчүн кыргыз-орус жумушчу тобу түзүлдү
Анын айтымында, жумушчу топ алгачкы отурумун ушул жылдын февраль айында өткөрүп, анда кыргыз тарап өндүрүштүн бардык тармагын жандандырууга кызыкдар экенин билдирген.
"Дүйнөлүк экономикалык өзгөрүүлөргө байланыштуу Кыргызстанга да бир топ кызыктуу инвестициялар, экономикалык долбоорлор сунушталууда. Биз бири-бирин кайталаган же иретсиз иштердин алдын алуу максатында Россия менен Кыргызстандын ортосунда мамлекеттик деңгээлдеги жумушчу топторун түздүк. Тагыраагы, эки өлкө өз-өзүнчө топ түзүп, анын курамы жагдайга, зарылчылыкка жараша өзгөрүп турмай болду. Эки өлкөнүн экономика министрлеринин орун басарлары өзүбүз жумушчу топту жетектеп да, кайра эле бири-бирибизди көзөмөлдөп да турабыз. Алгачкы жолугушуубузда кайсы багыттарга басым жасаларын, ишкерликтин кайсы тармактарын дароо колго алсак болорун сүйлөштүк. Жолугушууга чейин эки тарап тең анализ жүргүзгөнбүз. Анын жыйынтыгы менен кыргыз тарап жеңил өнөр жай, туризм, медициналык кызмат көрсөтүү, тейлөө багыттарын сунуштай аларын айтып, өлкөдө өндүрүштүн бардык түрлөрүн колго алууга кызыкдар экенибизди билдирдик. Ал эми Россия Федерациясы бизге оор технологиялар, куруучулук, жол салуу, медицина тармагында технологияларды сунушташты", — деди Усенбекова.
Ал эки тараптын жолугушуулары ай сайын өтүп турарын жана анда чечилген маселелерди ишке ашыруу дароо колго алынарын кошумчалады.
