Мамбетова: миграциялык өкүлчүлүктөр Москвадан башка шаарларда да ачылат
14:41 15.11.2022 (Жаңыртылды: 14:51 15.11.2022)
© Sputnik / Асел Акмат
Жазылуу
Социалдык өнүктүрүү министрлигинин миграция маселелери боюнча башкармалыгынын жетекчиси Жыпара Мамбетова Москва шаарында кыргызстандык эмгек мигранттарына ар тараптуу көмөк көрсөткөн борбор ачылганын айтты.
Ушул жылдын июль айында Россия Федерациясында Эмгек, социалдык камсыздоо жана миграция министрлигинин миграция маселелери боюнча өкүлчүлүгүн ачуу боюнча өкмөттүн атайын токтому чыккан. Учурда ачылып, 11-ноябрда ишин баштады. Бул тууралуу Жыпара Мамбетова Sputnik Кыргызстан радиосуна маек куруп жатып билдирди.
Мамбетова: миграциялык өкүлчүлүктөр Москвадан башка шаарларда да ачылат
Анын айтымында, аталган борбордо 11 киши эмгектенет.
"Кыргызстандык эмгек мигранттары Россияда көп болгондуктан министрликтин өкүлчүлүгүн ушул жакка ачуу боюнча министрлер кабинети токтом чыгарып, тапшырма койгон эле. Учурда ал ишке ашып Москва шаарында атайын борбор түзүлдү. Анда жалпысынан 11 киши эмгектенет. Алар Россия Федерациясынын аймагында жүргөн бардык кыргызстандыктарга укук маселесинде жана башка иштеринде көмөк көрсөтүшөт. Мисалы, иштеген жеринен маянасын ала албай калган жарандар, каттоого туруу боюнча, соттук, укуктук иштер, жүк-200, деги эле эмгек миграциясына байланыштуу бардык иштер боюнча кайрылууга болот. Эки тараптын келишимине ылайык өкүлчүлүктү ачууда биз Россия менен макулдашып жана алар бөлүп берген жерге жайгашышыбыз керек. Андыктан азырынча Москва шаарында гана ишибизди баштадык. Келечекте Россия Федерациясынын кыргызстандыктар көп жүргөн башка аймактарына да ачуу пландарыбыз бар", — деди Мамбетов.
Ал аталган өкүлчүлүк Россиядагы Кыргызстандын ИИМ, ТИМ жана башка мамлекеттик органдарынын бөлүмдөрү менен биргеликте иш алып барарын кошумчалады.
