Назарова: Россия өлкө мектептеринин ысык тамак программасына жардам берүүдө
© Sputnik / Гульнур Чолпонбаева
Жазылуу
Кыргызстандагы Дүйнөлүк азык-түлүк программасы иштеп чыккан "Мектептеги тамак-ашты оптималдаштыруу" программасынын адиси Мира Назарова Кыргызстандын мектептеринде ысык тамак уюштуруу маселеси боюнча тажрыйба алмашуу иш-чарасы биринчи ирет өтүп жатканын айтты.
19-сентябрдан 23-сентябрга чейин Ош облусунун эки мектебинде БУУнун Дүйнөлүк азык-түлүк программасы, Россиянын тармактык тамактануу институту (SIFI) менен биргеликте мектепте ысык тамак уюштуруу маселелери боюнча "Мектептерди өз ара окутуу" кампаниясы өтүүдө. Бул тууралуу Мира Назарова Sputnik Кыргызстан радиосунун эфиринде маек куруп жатып билдирди.
Назарова: Россия өлкө мектептеринин ысык тамак программасына жардам берүүдө
Анын айтымында, тажрыйба алмашуу өнөктүгү Кыргызстандын жети облусунун мектептеринде өтөт.
"Россия Федерациясынын каржылоосу менен Билим берүү жана илим министрлиги БУУнун Дүйнөлүк азык-түлүк программасынын колдоосу жана Россиянын тармактык тамактануу институтунун техникалык жардамы менен ишке ашырылып жаткан мектеп тамагын оптималдаштыруу программасынын артынан 850 мектеп ысык тамакка өттү. Алардын көпчүлүгү башка мектептерди ысык тамакка өткөрүүгө жана туура уюштурууга түрткү берип, үлгү болууда. Тажрыйба алмашуу иш сапары өсүп келе жаткан башталгыч класстын окуучуларына сапаттуу ысык тамак уюштурууга жардам берет. Кампаниянын алкагында мектептер ысык тамакка өтүү маселелеринде мыкты, натыйжалуу уюштуруу жана башкаруу тажрыйбалары менен алмашат. Иш сапар Араван районундагы Сайдахматова атындагы орто мектептен башталды. Бул мектепте ар бир облустун делегациялары: мектеп директорлору, жергиликтүү өз алдынча башкаруу органдарынын өкүлдөрү, ата-энелер комитетинин же мектептердин камкорчулук кеңешинин өкүлдөрү, ошондой эле райондук билим берүү бөлүмдөрүнүн мектеп тамагы боюнча адистери ысык тамак уюштуруу тажрыйбасы менен таанышып, күнөскананы жана мектептин ашканасын көрүштү. Ошондой эле мектеп тамагы үчүн жашылча-жемиш өстүрүү жана кошумча киреше алуу үчүн мектеп алдындагы участогун пайдалануу жаатында агротренингге катышышты. Ал эми Кара-Суу районундагы Парпиев атындагы окуу жайдын ысык тамакка өтүү жана мектеп алдындагы күнөскананы пайдалануу тажрыйбасы менен таанышуудан тышкары, катышуучулар өз мектептеринде тамак-аштын сапатын жакшыртуу үчүн эксперттердин жетекчилиги менен ар түрдүү жана пайдалуу меню түзүштү", — деди Назарова.
Ал тажрыйба алмашуу иш сапарынын жыйынтыгында ар бир мектеп Ош облусундагы ийгиликтүү тажрыйбаны үйрөнүп, алган маалыматтарына ылайык мектеп тамагын жакшыртуу боюнча өз иш планын түзөрүн жана келечекте мектептерге иштелип чыккан долбоорлорду ишке ашырууда консультациялык колдоо көрсөтүлөрүн кошумчалады.
