Бишкекке 120 электробус алуу үчүн Азия өнүктүрүү банкы 50,6 млн. доллар бөлөт
© Sputnik / Алексей Даничев
/ Жазылуу
Алына турган каражаттын жарымы кредит, жарымы грант.
БИШКЕК, 15-июн. — Sputnik. Бишкек шаарына 120 электробус алуу үчүн кыргыз өкмөтү Азия өнүктүрүү банкынан 50,65 миллион доллар алууга белсенип жатат.
Аталган макулдашууну ратификациялоо үчүн финансы министринин орун басары Руслан Татиков парламентке алып келди.
"Каражат 120 заманбап, энергияны үнөмдөөчү электробус жана аларды тейлөөчү жабдуулар, үч жылдык мөөнөткө керектүү тетиктер, бир эвакуатор, жай жана тез кубаттоочу инфраструктура сатып алууга жана орнотууга багытталат. Акчанын 25 миллион доллары — кредит, 25,65 миллиону — грант. Ал эми өкмөт тараптан 8,9 миллион доллар бөлүнөт. Кредиттин мөөнөтү 32 жыл болсо, анын сегиз жылы жеңилдетилген мөөнөт катары эсептелет. Бул учурда пайыздык коюму 1, андан кийин 1,5 пайызды түзөт", — деди Татиков.
Бишкектин вице-мэри Бакытбек Абдиев долбоордун алкагында шаардын 70 жерине электробусту кубаттоочу системалар орнотуларын билдирди.
