Эксперт: Россия менен АКШ кепке келиш үчүн жагдай кескин өзгөрүшү керек
Жазылуу
Эл аралык мамилелер боюнча эксперт Чынара Эсенгул Украинадагы абал көпкө чейин созулуп кетиши ыктымал экендигин айтып, абал кандай учурда өзгөрөрүн айтып берди.
Россия менен АКШ кепке келиш үчүн жагдай кескин өзгөрүшү керек. Украинанын инфраструктурасы кыйрап же анын жетекчилиги Россия менен ымалага келүүгө макул болушу шарт. Мындай пикирин Чынара Эсенгул Sputnik Кыргызстан радиосуна маек куруп жатып билдирди.
Эксперт: Россия менен АКШ кепке келиш үчүн жагдай кескин өзгөрүшү керек
Анын айтымында, Украина бийлигинин ийкемдүүлүгүнөн көп нерсе көз каранды болот.
"Украинадагы тиреш узак убакытка созулушу ыктымал. Анткени буга карата көптөн бери бардык тараптан даярдыктар көрүлгөн. Владимир Зеленскийдин саясатта жүрбөй эле президент болушу ошол сценарийдин бир эпизоду болушу мүмкүн. Анткени ал Украинанын өз жолу бар, НАТО болобу, Евробирмдик болобу, тандоо укугу бар деп жатат. Батышка ушундай катуу тура алган адам керек болгондуктан колдоп келишүүдө. Менимче, ал өз программасын аткарат. Ошондуктан анын Россия менен сүйлөшүү аркылуу кандайдыр бир жыйынтыкка келиши татаал болууда. Ал эми Россиянын позициясы НАТОну өз чек арасынан алысыраак кетирүү. Алар деле ушунча башталгандан кийин аягына чыгарат. Өз таасирин Украинанын батышына чейин жайылтат. Батыш бул жерде маанилүү ролду ойнойт. Буга чейин Минск келишимин Украина тарап аткарбай турганын айтып келген. Анткени Батыш мамлекеттеринен сүйлөшүүлөргө маани бербей эле кой деген көрсөтмө келип турган деген Россия тараптын билдирүүлөрү чын сыяктуу. Батыш сүйлөшүүлөргө маани бербей койду. Кыргыздарда кепке келбей койду деп коет мындайда. Россия менен АКШ кепке келиш үчүн жагдай кескин өзгөрүшү зарыл. Украинанын инфраструктурасы толугу менен кыйрап, мамлекеттүүлүк жок болуп калуу коркунучуна кептелип же анын жетекчилиги Россия менен ымалага макул болушу зарыл. Башкача айтканда, абал өтө начарлап же жакшырып кетиши керек. Бирок учурдагы Украина жетекчилиги ийкемдүү болуу каалоосу жок", — деди Эсенгул.
Ошондой эле ал Украина жетекчилиги Батыштагы өнөктөштөрүн кырдаалды тынчтык жолу менен чечүүгө ынандырса сүйлөшүүлөргө жол ачыларын кошумчалады.
