Кененбаева: 1 500 маморган электрондук документ жүгүртүүгө өттү
Жазылуу
"Инфоком" мамлекеттик ишканасынын директорунун орун басары Асел Кененбаева электрондук документ жүгүртүү убакытты жана каражатты үнөмдөй турганын белгиледи.
Учурда 1 500 мамлекеттик орган жана аларга караштуу уюмдар, 484 айыл өкмөт электрондук документ жүгүртүүгө өттү. Бул тууралуу Асел Кененбаева Sputnik Кыргызстан радиосунда маек куруп жатып билдирди.
Кененбаева: 1 500 маморган электрондук документ жүгүртүүгө өттү
Анын айтымында, бул логистикалык жана канцелярдык чыгымдарды азайтууга түрткү.
"Санариптештирүү качан бүтөт деген суроолор көп берилет. Процесс улам өзгөрүүлөр, толуктоолор жана жаңыланууларга дуушар болуп турат. Бул жагынан алганда санариптештирүү бүтпөй турган процесс. Анткен менен кайсы бир баскычтарды басып өттүк. Учурда жергиликтүү адистердин күчү менен документ жүгүртүү толук кандуу электрондук форматка өттү. Алгач беш мамлекеттик органга сынамык иретинде киргизилсе, азыркы тапта 1 500 мамлекеттик орган жана аларга караштуу уюмдар толук кандуу электрондук документ айлантууга өтүп жатышат. Эми бул мекемелерде мурдагыдай кагаз документтерди көчүрмөлөп, таратуу зарылдыгы жок. Ошондой эле документтердин кайсы бөлүмгө, мекемеге жеткенин көзөмөлдөө мүмкүн. Бул логистикалык, канцелярдык чыгымдарды жана убакытты үнөмдөйт. Мисалы, азыркы тапта 484 айыл өкмөтү электрондук документ жүгүртүүгө өттү. Эми алар жогорку рангадагы жетекчиликтин буйруктарын дароо кабыл алышат. Жалпы алганда мамлекеттик жана муниципалдык уюмдардын 90 пайызы электрондук документ жүгүртүүдө. Юридикалык уюмдар жана коммерциялык тармак калды. Бул багытта адистерди окутуулар тынымсыз жүргүзүлүп, техникалык камсыздоо иштери жыйынтыкталууда", — деди Кененбаева.
Ошондой эле ал иш кагаздарды толугу менен электрондук форматта жүргүзүү боюнча нормативдик базаны жөнгө салуу иштери калганын кошумчалады.
