Кененбаева: жалпы 70 миңден ашык электрондук кол тамга берилди
10:43 08.04.2022 (Жаңыртылды: 11:13 08.04.2022)
Жазылуу
"Инфоком" мамлекеттик ишканасынын директорунун орун басары Асел Кененбаева электрондук кол тамганы колдонуу шарттары жана мүмкүнчүлүктөрү тууралуу айтып берди.
Жалпы 70 миңден ашык электрондук кол тамга берилди. Анын 30 миңден ашыгы юридикалык, калганы жеке жактар. Бул тууралуу Асел Кененбаева Sputnik Кыргызстан радиосунда маек куруп жатып билдирди.
Кененбаева: жалпы 70 миңден ашык электрондук кол тамга берилди
Анын айтымында, мыйзамга ылайык электрондук кол тамга кадимки кол тамгага тете болот.
"Электрондук кол тамганы берүү 2008-2009-жылдары башталган. Бул үчүн атайын жабдык дагы берилип, баасы 2700 сомду түзө турган. Көбүнчө эсепчилер тарабынан салык, Соцфондго отчёт бергенде колдонулган. Баасына жана колдонуудагы ыңгайсыздыктан улам муну таратуу кыйынчылык туудурган. Кийин санариптештирүү багытында саясат күч алганда мурдагы электрондук кол тамгага альтернатива табууга буйрутма берилген. Мындан улам 2020-жылы электрондук булут кол тамгасы Казакстандан сатып алынган. Анын маалыматтык коопсуздугу сакталып, колдонуу ыңгайлуулугу салыштырмалуу жакшыраак эле. Башында электрондук кол тамганы акы төлөө менен берүү мерчемделген. Бирок кийин жарандарга бекер берүү чечими кабыл алынган. Учурда бардык жарандар электрондук кол тамганы акысыз Калкты тейлөө борборлорунан, салык кызматтарынан жана айрым банктардан ала алышат. Азыркы тапта коопсуз шаар долбоору, электрондук мамлекеттик кызматтар жайгаштырылган портал, айрым салыктык кызмат көрсөтүүлөр, электрондук документ жүгүртүүлөр жана башка ички системалар электрондук кол тамга менен иштейт. Азыркы тапта бардыгы болуп 70 миңден ашык электрондук кол тамга берилди. Анын 30 миңден ашыгы юридикалык, калганы жеке жактар", — деди Кененбаева.
Ошондой эле ал учурда 1500дөн ашык мамлекеттик орган электрондук документ айлантууга өтүп жатканын белгилеп, бул багытта да электрондук кол тамга колдонулуп жатканын кошумчалады.
