Балдар ракка кабылганы кантип байкалат? Кыргызстандык онкологдун эскертүүсү
Жазылуу
Онкологдун айтымында, ракка кабылган балдардын 40 пайызы лейкоз менен жабыркайт. Анын симптомдору вирустук инфекцияларга окшош.
БИШКЕК, 23-фев. — Sputnik. Балдардын рак оорусуна чалдыкканын кайсы симптомдор билдирип турарын Sputnik Кыргызстан радиосуна Эне жана баланы коргоо улуттук борборунун онкология бөлүмүнүн жетекчиси Султан Стамбеков айтып берди.
Ал балдар онкологиясынын 40 пайызы лейкоз оорусу экенин белгилеген.
"Бул илдет менен вирустук инфекциянын симптомдору окшош. Бала чарчаңкы тартып, маанайы түшүп, тамакка табити тартпай, дене табы көтөрүлүп, дем алуусу начарлап, бүйлөсү канап, мурдунан кан агып, лимфа түйүндөрү кичирейет. Педиатрлар сасык тумоо экен деп дарылайт, ал жардам бербесе дарылоону өзгөртүшөт, ал дагы натыйжа бербейт. Акыры вирус эмес экенинен шек санап диагноз коюуга киришишет, ага эле бир нече ай кетет. Бул өтө кооптуу", — деген дарыгер.
Учурда Кыргызстанда 100 миң балага 8-10 ооруган бөбөк туура келет. Бирок дарыгер ооруканага кайрылбай жүргөн балдар да болушу мүмкүндүгүн кошумчалады.
Былтыр ноябрда Улуттук онкология жана гематология борборунун балдардын онкология бөлүмү Эне жана баланы коргоо улуттук борборуна өткөн. Имарат төрт кабаттуу, керектүү жабдуусу жетиштүү. Мурда 41 орун болсо, азыр 70ке чейин көбөйтүлгөн. Ошондой эле кошумча адистер алынган.
