Касымов: мамлекеттик-жеке өнөктөштүккө өткөн объектилер функциясын өзгөртпөйт
12:48 04.10.2021 (Жаңыртылды: 23:17 22.12.2021)
© Sputnik / Асель Сыдыкова
Жазылуу
Мамлекеттик-жеке өнөктөштүк борборунун улук эксперти Эрденет Касымов аталган мекеме жаңы түзүлгөнүн белгиледи.
Мамлекеттик-жеке өнөктөштүк боюнча 30дан ашык долбоор даярдалып, үчөө ийгиликтүү иш алып барууда. Бул тууралуу Эрденет Касымов Sputnik Кыргызстан радиосунда маек куруп жатып маалымдады.
Касымов: мамлекеттик-жеке өнөктөштүккө өткөн объектилер функциясын өзгөртпөйт
Анын айтымында, 2021-жылдын августунда "Мамлекеттик-жеке өнөктөштүк жөнүндө" мыйзамдын жаңы редакциясына президент тарабынан кол коюлган.
"Мамлекеттик-жеке өнөктөштүк борбору ишкерлер менен активдүү иш алып барууда. Мында мамлекет активдерге жеткиликтүүлүктү камсыздап, уруксат кагаздарын берип, колдоо көрсөтөт. Ал эми жеке ишкердин тажрыйбасы, каржысы жана инновациялык ыкмалары колдонулат. Келишим түзүлгөн соң долбоор иштеп баштайт. Учурда 30дан ашык долбоор даярдалып, сүйлөшүүлөр ар кандай стадияда турат. Ийгиликтүү иштеп жаткан үч долбоор бар. Алсак, Бишкек, Ош жана Жалал-Абад шаарында гемодиализ кызматы көрсөтүлүүдө. Мындан тышкары, "Кызыл Кыргызстан" балдар кинотеатры реконструкцияланды. Дагы бир ийгиликтүү долбоор — коомдук транспортко электрондук билет орнотуу. Мындан тышкары, алты долбоор жеке өнөктөштү тандоо баскычында турат. Мыйзамда жеке тарап мамлекеттик мекеменин өз функционалын өзгөртпөшү керек деп белгиленген. Башкача айтканда, ишкер театрды мамлекеттик-жеке өнөктөштүк боюнча алса театр катары иштетиши керек. Бирок анын ичинде же жанында кызмат көрсөтүүчү, коштой туруучу бизнес ачса болот. Мисалга ошол эле театрдын ичине тамактануучу жай ачуусуна уруксат берилет", — деди Касымов.
Ошондой эле ал айрым имараттардын тарыхый-мурас статусу болгондуктан ишкерлерге берүүдө тоскоолдуктар жаралып жатканын кошумчалады.
