Орус-кыргыз канатташ жылы Улуу Жеңиштин 75 жылдыгы менен катар белгиленип, эки өлкөнүн китепканалары бир топ иш-чараларды өткөрүштү. Бул тууралуу Венера Качкимбаева Sputnik Кыргызстан радиосуна маек куруп жатып маалымдады.
Качкимбаева: улуттук китепкана Жеңиштин 75 жылдыгын жакшы белгиледи
Анын айтымында, ушул жылы офлайн-режимде Ысык-Көлдө "Кыргызстан жана Россия биримдиги" деген аталыштагы илимий конференция болуп өткөн.
"Кыргызстан Россиянын китепканалары менен мурдатан эле тыгыз иштешип келет. Ал эми кыргыз-орус канатташ жылынын алкагында бул алакабыз дагы да бекемделди. Көптөгөн иш-чараларыбыз пандемияга байланыштуу онлайн-режимде өтүп жатты. Ошондой эле Улуу Жеңиштин 75 жылдыгы дагы ушул учурга туш келгендиктен бул темада да конкурстар, конференциялар уюштурулду. Ага бир гана эки өлкөнүн китепкана кызматкерлери эмес, жөнөкөй жарандар да катышты. Мисалы, Бишкек тургундарынын арасында Улуу Жеңиш тууралуу ыр, чыгармалардан үзүндү окуп, видео тартып конкурстун жеңүүчүсү болгон жарандарыбыз бар. Ошондой эле эки өлкөнүн канатташ жылы долбоорун жыйынтыктоочу иш-чара болуп, август айында чоң илимий конференция уюштурулду. Ага китепкана өкүлдөрүнөн сырткары театр, музей кызматкерлери, жетекчилер да катышты", — деди Качкимбаева.
Ал улуттук китепкана көп жылдан бери Россиянын мамлекеттик китепканасы, президентинин китепканасы жана Маргарита Рудомино атындагы Россия чет элдер адабияты китепканасы менен иштешерин кошумчалады.
