БИШКЕК, 26-авг. — Sputnik. Кыргызстанда окуу жылы мындан кийин дайыма 15-сентябрда башталат. Бул тууралуу Sputnik Кыргызстан агенттигине өкмөттүн маалымат кызматынын башчысы Эркин Сазыков билдирди.
Анын айтымында, министрлер кабинетинин төрагасы Улукбек Марипов кол койгон токтомдо атайын документтер бар. Анда 1-сентябрь деген сан 15-сентябрь менен алмаштырылган. Документ күчүнө кирген соң мындан кийинки жылдары да окуу жылы токтомдо көрсөтүлгөн убакытта башталат. Башкача айтканда, туруктуу болуп калат.
"Окуу жылынын 15-сентябрда башталып жаткан негизги себеби азыркы эпидемиологиялык кырдаал. Мындан сырткары, туристтик сезондун узартылышына жакшы жардам болот деген ойдобуз. Буга чейин бир катар ата-энелер да окуу жылынын башталышын жылдырууну суранып депутаттарга чейин кайрылышкан. Анткени айыл жерлеринде дал ушул мезгилде жыйым-терим башталып, айрымдары балдарын мектепке даярдаганга жетишпей калышчу", — деди Сазыков.
Токтомго ылайык, 2021-2022-окуу жылы 9-июнда аяктайт. Быйылкы окуу жылы өлкө боюнча бардык мектептерде кадимки тартипте башталары да айтылды.
