БИШКЕК, 4-дек. — Sputnik. Ар кандай кылмыштарды жасап издөөгө алынган кыргызстандыктар Москвадан кармалды. Бул туурасында ИИМдин маалымат кызматы билдирди.
"Башка бирөөнүн мүлкүн алдап ээлеп, качып кетип, жабырлануучуларга арбын ыңгайсыздык жаратып, алдамчылык менен издөөдө жүргөн жана бүтүндөй бир үй-бүлөнү өлтүрүү максатында кол салып мамлекеттер аралык издөөгө алынгандар Москвадан кармалды", — деп айтылат маалыматта.
ИИМдин РФтеги өкүлчүлүгү 2020-жылдын ноябрь айында Россиянын укук коргоо органдары менен биргеликте издөөдө жүргөн бир нече адамды колго түшүргөн:
Чүй облусунун 28 жаштагы Н.Т. аттуу жашоочусу ири суммада жасалган алдамчылык үчүн 2020-жылдын август айынан бери издөөдө жүргөн. Ал 2017-жылы октябрь айында алдоо жолу менен ээ болгон Mercedes S-500 үлгүсүндөгү автоунаасынын камакка алынганына карабастан соттун чечими жок сатып жиберип, качып кеткен. Алдамчылыгы менен жабырлануучуга 342 000 сомдон ашык чыгым тарттырган.
Чүй облусунун 31 жаштагы М.А. аттуу жашоочусу 2019-жылдан бери мамлекеттер аралык издөөдө жүргөн. Анын изине УКМК түшкөн. Кылмыш жасоого башка катышуучуну көндүрүп, шыкактаган, кызмат абалынан кыянаттык менен пайдаланган, расмий документке билип туруп жалган маалыматтарды киргизген, ошого тете расмий документке анын анык мазмунун бурмалаган оңдоолорду киргизген деп шектелген.
Баткен облусунун 35 жаштагы М.К. аттуу жашоочусуна 2019-жылдан бери Финансы полициясы мамлекеттер аралык издөө жарыялаган. Ал кызмат абалынан кыянаттык менен пайдаланган, расмий документке билип туруп жалган маалыматтарды киргизген, ошого тете расмий документке анын анык мазмунун бурмалаган оңдоолорду жасаган деп айыпталган.
Жалал-Абад облусунун 46 жаштагы жашоочусу 2020-жылдан бери мамлекеттер аралык издөөдө жүргөн. Ал беш жыл мурда Ж.Н. аттуу жарандын мүлкүн алдап алып, качып кеткен. Келтирген материалдык чыгым 810 000 сомду түзгөн.
ИИМден учурда жогоруда көрсөтүлгөн фактылар боюнча издөөгө алган тарапка кабарлама жөнөтүлүп, Кыргызстан менен Россиянын укук коргоо органдары изделип жаткан жарандарды кылмыш жоопкерчилигине тартуу үчүн өз өлкөсүнө жөнөтүү маселесин чечип жаткандыгын кошумчалашты.
