БИШКЕК, 23-окт. — Sputnik. Антибиотиктер коронавируска каршы иштебейт жана аны алдын алуу үчүн дагы пайдасыз. Бул тууралуу Россиянын Саламаттык сактоо министрлигинин башкы микробиологу Роман Козловго шилтеме берип РИА Новости жазды.
"Кандай гана антибиотик болбосун, вирустарды жок кыла албайт. Адам аны себепсиз иче берсе микроорганизмдер ага көнүп алат да, кийин чындап антибиотик керек ооруларга чалдыкканда пайдасы тийбей калат. Экинчиден, антибиотик эч бир бактериялык илдеттерди дагы алдын ала албайт", — деди Козлов.
Андыктан адис эч бир медициналык препаратты өзү билемдик менен пайдаланбоого чакырат. Анын айтымында, дары-дармектер дарыгер сунуштабаган учурларда жөн гана пайдасыз болбостон, ден соолукка чоң зыян алып келиши мүмкүн.
