Кыргызстанда гриппке каршы эмдөө канча турары айтылды
Гриппке каршы акысыз эмдөө Бишкек жана Чүй аймагында 16-сентябрдан тарта жүргүзүлө баштады. Бул тууралуу Жумагүл Усубалиева Sputnik Кыргызстан радиосунун эфиринде айтты.
Анын билдиришинче, республиканын калган аймактарына вакцина жеткирилери менен калктын тобокел тобуна кирген катмары эмдөөдөн өтөт.
Эскертүү! Сасык тумоого каршы бекер вакцина калктын 13 пайызына гана жетет
"Кыргызстанда грипптин күчөгөн маалы октябрь айынан башталат, ал эми сасык тумоо илдети декабрь айларына туура келет. Азыркы алып келинген вакцина КРВИнин төрт түрүнө каршы сайылат. Вакциналар жыл сайын ДССУ тарабынан изилденип, гриппти чакырган кайсы вирустун түрү бул сезондо элге көбүрөк жайылары аныкталып, ошого карата эмдөө жүргүзүлөт. Мындан улам айрым жылдары КРВИнин үч түрүнө, башка жылы төрт түрүнө карата вакцина иштелип чыгат. Бирок бул эмдөөдөн өтсө эле ошол бойдон гриппке чалдыкпайт дегенди түшүндүрбөйт, анткени вирустун башка түрлөрү да эл арасында болушу мүмкүн. Вакцина алган адам тумоону жеңил көтөрөт. Быйыл калктын тобокел тобуна мамлекет акысыз эмдөө жүргүзөт. Бул топко кирбеген адамдар өз каражатына вакцина алышы керектелет. Азырынча жеке менчик медициналык мекемелерде вакцинанын наркы 750 сом деп бааланууда. Бирок баалар медициналык жайларда бири-биринен айырмаланып калышы ыктымал", — деди Усубалиева.
Ал вакцина сайылгандан эки жумадан кийин иммунитет пайда болуп, бир жылга дейре организмде кармалып турарын кошумчалады.
