БИШКЕК, 4-май — Sputnik. Президент Сооронбай Жээнбеков коронавирус жуктуруп алып дүйнөдөн кайткан дарыгер Жүзүмкан Көкүмбаеванын жакындарына көңүл айтты. Бул тууралуу өлкө башчынын маалымат кызматы кабарлады.
"Дарыгер Жүзүм Көкүмбаева коронавирус илдетинен дүйнөдөн кайтты деген суук кабарды терең кайгыруу менен кабыл алдым. Бул илдет менен күрөштө ак халатчан медиктерибиз алдыңкы сапта турушат. Илдетти жуктуруп алуу коркунучуна карабай, жабыркап жатышса да өтө бийик каармандык жана тайманбастык менен жарандарыбызды өлүмдөн, оорудан сактап калууда. Тилекке каршы, бул күрөштө ак халатчан дарыгерибизден айрылып отурабыз", — деп жазылат президеттин кайрылуусунда.
Ал Көкүмбаева өзүнүн дарыгерлик милдетин толугу менен аткарып, көп жылдык эмгеги менен элдин саламаттыгына кызмат кылып, жүздөгөн жаштарга насаатчы болгондугун баса белгиледи.
"Дүйнөлүк апааттын биздин өлкөгө келиши менен анын жайылышын токтотууда алдыңкы сапта жүрдү. Жүзүмкан Көкүмбаеванын элеси ар дайым жүрөгүбүздө сакталат. Ак жүрөк дарыгерибиздин бир туугандарына, жакындарына жана балдарына көңүл айтам, аза кайгысын тең бөлүшөм", — деди Жээнбеков.
Эске салсак, коронавирус инфекциясынын кесепетинен №3 үй-бүлөлүк дарыгерлер тобунун жетекчиси Жүзүмкан Көкүмбаева 58 жаш курагында мезгилсиз дүйнөдөн кайткан. Ал 2-май күнү ооруканада дарыланып жаткан жеринен үзүлгөн.
Дарыгер Жүзүмкан Көкүмбаева Бишкектеги №5 жана №3 үй-бүлөлүк медицина борборунда 30 жылдан ашуун эмгектенген.
