БИШКЕК, 29-апр. — Sputnik. 1-майдан тарта айрым ишканалардын ишине уруксат берилгенине карабай, коменданттык саат токтотулбайт. Бул туурасында биринчи вице-премьер Кубатбек Боронов брифинг учурунда билдирди.
Анын айтымында, жарандардын көчөгө чыгышын чектөө максатында өзгөчө абалдын режимин дагы 10 күнгө узартуу чечими кабыл алынган. Мындан улам өткөрмө кагазын берүү системасын дагы жоюуга болбойт.
“Эгер шаарга кирүүгө уруксат берип койсок, көзөмөлгө алып турган мүмкүнчүлүктөрдүн баары жокко чыгып, оору тарап кетиши мүмкүн. Эгер кандайдыр бир оорулуу адам болсо, элге аралашып жайылтып жиберсе кайра дагы режимдерди киргизип отурбастан, 10 күн чыдап коюшубуз керек. Жумуштарды аягына чыгарып алсак, баарыбызга жеңил болот. Ошондуктан өзгөчө абалдын режими кала берет, өткөрмө кагазы дагы талап кылынат”, — деди Боронов.
Белгилей кетсек, кечээ, 28-апрелде, Коопсуздук кеңеши Бишкек, Ош, Жалал-Абад шаарлары жана Ат-Башы районунда өзгөчө абалдын мөөнөтүн 10-майга чейин узартуу чечимин кабыл алган. Ошону менен катар эле өкмөт 1-майдан тарта өлкөдө ишкерликтин жети түрүн жандантууга уруксат берген.
Коронавирустун кесепети
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
