БИШКЕК, 24-мар. — Sputnik. Кыргызстандын 38 айылы таза, ичүүчү суу менен камсыздалды. Бул тууралуу өкмөттүн маалымат кызматы кабарлады.
Билдирмеге ылайык, эми жалпы жонунан 47 миңден ашык адам таза суу иче баштайт.
Мындан тышкары, 2019-жылы жалпы суммасы 100 миллион доллар болгон жети долбоордун макулдашуусуна кол коюлган. Ал жүзөгө ашып калса, 150 миңден ашык жаран үчүн таза суу жеткиликтүү болот. Кол коюлган долбоорлор:
- "Мырзаке, Дөң-Булак жана Куршаб жергиликтүү өз алдынча башкаруу органдарын суу менен камсыз кылуу системаларын реабилитациялоо" долбоору;
- "Жалал-Абад шаарынын суу менен камсыз кылуу жана канализация системаларын реабилитациялоо (2-фаза)" долбоору;
- "Исфана шаарынын суу менен камсыз кылуу системасын реабилитациялоо" долбоору;
- "Кербен шаарынын суу менен камсыз кылуу системасын реабилитациялоо" долбоору;
- "Айыл жергесинин суу менен камсыз кылуу системасын жана санитариясын өнүктүрүү" долбоору;
- "Нарын облусундагы айылдарды суу менен камсыздоону жана санитарияны өнүктүрүү" долбоору;
- "Көп тармактуу ишмердүүлүктү чакан колдоо - Кыргыз Республикасы үчүн чакан сарптоолорду каржылоо механизми" долбоору.
Учурда бул долбоорлор боюнча ички жол-жоболорду жүзөгө ашыруу боюнча иштер жүрүп жатканы кабарланды.
