БИШКЕК, 4-мар. — Sputnik. Улуу Ата Мекендик согуштун ардагерлерине бир жолу төлөнүүчү жардам катары 75 миң сомдон бөлүнөт. Бул тууралуу президенттин маалымат кызматы кабарлады.
Билдирмеге ылайык, президент Сооронбай Жээнбеков Улуу Ата Мекендик согуштун ардагерлерине бир жолку төлөмдөр жөнүндө Жарлыкка кол койгон.
Азыркы тапта өлкөдө Улуу Ата Мекендик согуштун 251 ардагери жашайт. Алардын ичинен 65и — согуштун майыптары, 153ү — согуштун катышуучулары, 15и — экинчи дүйнөлүк согуш мезгилинде фашисттер жана алардын союздаштары түзгөн концлагерлерде, мажбурлап кармоо жайларында жашы жетелек кезинде туткун болгон адамдар. 18и — 1941-1944-жылга чейин Ленинград шаарындагы ишканаларда, мекемелерде жана уюмдарда иштеген, ал эмгеги үчүн сыйланган адамдар.
Президенттин маалымат кызматы 2010-жылдын 1-январынан тартып Улуу Ата Мекендик согуштун ардагерлерине жеңилдиктердин ордуна ай сайын 7000 сомдон акчалай компенсация берилип келерин айтты. Мындан сырткары, президенттин өмүр бою берилчү 10 000 сом өлчөмүндөгү стипендиясы төлөнөрү, ардагерлер ай сайын пенсия да алышары кошумчаланды.
