БИШКЕК, 21-фев. — Sputnik. Бишкекте 19 жаштагы жигитке тапанча такап коркутууга шектелгендер кармалганын Кайгуул милиция кызматынан билдиришти.
Буга чейин окуянын видеосу Oppa.kg аталышындагы Instagram-аккаунтка жүктөлгөн. Кадрдан эки киши чатакташа кеткенин, анын биринин колунда ок атуучу курал бар экендигин байкоого болот. Эркек кишилер бири-бирин түрткүлөп, андан кийин тапанчасы жогу павильонго кирип эшикти бекитип алган.
Посмотреть эту публикацию в Instagram
Видеонун алдына жазылган маалыматка ылайык, окуя 18-февраль күнү Көлбаев жана Калинин көчөлөрүнүн кесилишинде болгон. Коркуткан киши Жаза аткаруу кызматынын кызматкери болушу мүмкүндүгү айтылган. Бул маалымат такталып же четке кагылган дагы жок.
Укук коргоо органдары тарабынан 26 жана 31 жаштагы шектүүлөр кармалган. Алардын биринин жанынан пневматикалык тапанча табышкан. Свердлов райондук ИИБи Жазык кодексинин 266-беренеси ("Ээнбаштык") менен сотко чейинки өндүрүштү баштады.
