БИШКЕК, 19-фев. — Sputnik. Коронавирустан улам Япониянын Иокогама портунда эки жумадан бери кармалып турган круиздик лайнер карантинден чыгарылды. Бул тууралуу РИА Новости жазды.
Алгачкылардан болуп кемеден чемоданын сүйрөп улгайып калган аялдын түшкөнү айтылат. Ал жүргүнчүлөрдү күтүп жаткан жоон топ журналисттин суроолоруна жооп берүүдөн баш тартты. Андан кийин бир эркек киши түшүп, анын да өз алдынча эле басып кеткени белгилүү болду.
Лайнердин жанында ондогон автобус күтүп турган.
Белгилей кетсек, 3,7 миң жүргүнчүсү менен саякатка чыккан Diamond Princess кемеси 5-февралдан бери карантинде болчу. Акыркы маалыматтар боюнча, коронавирус жуктуруп алгандардын саны 540 адамга жеткени маалым эле.
Аталган лайнерде бир кыргызстандык жаран бар. Аны менен 6-февралдан тарта КР Консулдугу байланышта болуп жаткан. Sputnik Кыргызстан маалымат агенттиги мекендешти таап, саламаттыгы, кемедеги жалпы абал тууралуу баарлашкан.
19-февралга карата коронавирус жуктуруп алгандардын саны Кытайда 74 миңден ашты, 2004 адам каза болсо, 14,4 миң бейтап сакайып чыкты.
