БИШКЕК, 14-окт. — Sputnik. Өзбекстандын Фергана облусундагы коопсуздук боюнча мамлекеттик башкармалыгы Курандын уникалдуу нускасын Кыргызстан жаранына сатуу аракетин билип калып, токтотту. Бул туурасында "Өзбекстан 24" телеканалы билдирген.
Видеосюжет Youtube каналына жарыяланды.
Китепти 150 миң долларга сатмакчы болушкан. Шектүү катары кармалган жарандын 49 жашта экендиги маалымдалды. Анын айтымына караганда, китепти үйүнөн Кокондогу досуна алып келип, ал жерден кыргызстандык жаран менен таанышып калган. Кеп аны сатуу боюнча уланып кеткен. Кармалган адам бул кылыгы үчүн өкүнүп жаткандыгын айтты.
Адистер кол жазма түрүндөгү, барактарына алтын жалатылган, Самарканд каллиграфиясынын стилиндеги бул эмгекти 1,88 миллиард сум (болжол менен 200 миң доллар) деп баалаган.
Маданият, маалымат жана туризм министрлигинен XVI кылымда жазылган текстти формага Юсуф Саххоф молдо келтиргендигин айтышкан. Кийинчерээк, XIX кылымдын аягында, XX кылымдын башында Куран реставрацияланган.
Кол жазма абдан баалуу болгондуктан аны өлкөнүн аймагынан чыгарып кетүүгө тыюу салынган. Реликвия Өзбекстандын мамлекеттик музейине өткөрүп берилмекчи.
