ОШ, 1-авг. — Sputnik. Ош облусунун Кара-Суу районунун Төлөйкөн айыл өкмөтүндөгү жарылуу болгон май куюучу жай буга чейин да эреже бузуп, жарнамалык тактасын унаа жолдун кызыл сызыгына орнотуп алган. Бул тууралуу Экологиялык жана техникалык коопсуздук боюнча мамлекеттик инспекциянын Кара-Суу району боюнча аймактар аралык башкармалыгынын башчысы Рысбек Юсупов Sputnik Кыргызстан агенттигине билдирди.
Белгилей кетсек, 31-июлда саат 22.10дор чамасында Учар айылында жайгашкан Red Petroleum май куюучу жайдан өрт чыккан. Кийинчерээк кырсыкка 10 тонналык бензовоз станцияга май куюп жатканда жарылып кетиши себеп болгону айтылган. Каргашадан эч ким жабыркаган эмес. Ал эми Ош облустук милициясы бул боюнча кылмыш иши козголгонун билдирген.
Юсуповдун айтымында, буга чейин Ош шаарындагы Түштүк-Чыгыш кичирайонунда жайгашкан май куюучу жайда 2019-жылдын 20-мартында болгон жарылуудан соң Башкы прокуратура жана өкмөттүн тапшырмасынын негизинде Кара-Суу районундагы 63 май куюучу станция текшерүүгө алынган. Анын ичинде 31-июлда күйүп кеткен май куюучу жай да бар.
"Буга чейинки текшерүү учурунда бул жайда өрт чыккан учурда кабар берүүчү сигнализациясы иштебей тургандыгы аныкталган. Ал гана эмес, майдын баасы көрсөтүлгөн жарнамалык такта жолдун кызыл сызыгынан өтүп орнотулганы белгилүү болгон. Бул кемчиликтерди жоюу боюнча станция ээсине эскертүү жана убакыт берилген", — деди Юсупов.
Юсуповдун айтымында, Кара-Суу районундагы Silk Way деп аталган үч станция Кытай мамлекетине караштуу болуп, баш кеңсеси Бишкекте жайгашкандыктан, кызматкерлери Экотехинспекциянын өкүлдөрүн киргизбей, иштөөсүнө тоскоолдук жараткан. Бул боюнча алар райондук прокуратурага кайрылышкан.
Мындан сырткары, "Россия Нефть" ишканасынын төрт станциясында өрт коопсуздугу боюнча эрежелер сакталбагандыгы аныкталган. Бул факты боюнча акт түзүлүп, 7500 сом айып пул салынган.
"Tомас" ишканасына таандык делген төрт станциянын салынышында имараттардын ортосундагы аралык 50 метрге жетпегендиги аныкталды. Бул боюнча материал сотко өткөрүлөт. Себеби станция биринчи курулуп, андан кийин салынган имараттар эреже-норманы бузганбы же тескерисинчеби? Бул маселени сот териштирет. Мындан сырткары, аталган төрт станциянын курулушу мамлекеттик кабыл алуудан өткөрүлбөй туруп иштеп жатканы аныкталды.Райондук архитектуранын же башка тиешелүү кызматтардын уруксаты жок туруп, ээси өзүм билемдик менен Кара-Суу районунун Кызыл-Кыштак айылына курган станция боюнча ишти да райондук сотко өткөрдүк", — деди Юсупов.
Ал сигнализациясы иштебеген же өрт өчүрүүчү шаймандары жок станция ээлеринин баарына тең эскертүү берилгенин айтты.
