Ошто күйүүчү май куюучу жайдан өрт чыкты. Бул туурасында аймактык кабарчы жеринен билдирди.
Анын айтымында, калаанын Түштүк-Чыгыш кичирайонуна кире бериштеги Oktan Service аталышындагы күйүүчү май куюучу станция өрттөнүп жатат.
"Бул жерде турган күбөлөр саат 20.15 чамасында май куюучу жайда жарылуу болгонун айтууда. Учурда милиция кызматкерлери тегерек четин курчап элди өткөрбөй жатат", — деди кабарчы.
Өзгөчө кырдаалдар министрлиги тилсиз жоо менен кармашууга беш өрт өчүрүүчү унаа тартылганын кабарлады. 101 кызматына саат 20.16да чакыруу түшкөн.
Кырсыктан жабыркагандар туурасында азырынча маалымат жок.
