БИШКЕК, 13-июн. — Sputnik. 12-июндан тарта Россиядан баланы чет өлкөгө алып чыгуу боюнча жаңы мыйзам күчүнө кирди. Бул тууралуу РИА Новости жазды.
Мурдагы шарттар боюнча баласынын өлкөдөн чыгышына каршы болгон ата же эненин Чек ара кызматына гана кайрылып коюусу жетиштүү болчу.
Юристтердин түшүндүргөнүнө караганда, жаңы эреже баланы эта-эненин биринин эркине каршы өлкөдөн чыгарып кетүүгө бөгөт коёт.
"Өз каршылыгы тууралуу арызды ИИМдин жакын жердеги каалаган бөлүмүнө берүү оңоюраак. Анткени полиция бөлүмдөрү чек ара бөлүмдөрүнө караганда 2-3 эсе көп", — деп айтылат макалада.
Бул мыйзам Россиянын бардык жарандарына тиешелүү. Белгилей кетсек, Россия жарандыгын алган кыргыздар аз эмес.
КР Мамлекеттик миграция кызматынан билдиришкендей, 2018-жылдын 1-мартына карата маалымат боюнча Россияда 632 миң 337 кыргызстандык болгон. Алардын ичинен 876сы эле 2017-жылы Россия жарандыгын алган.
