БИШКЕК, 7-май — Sputnik. Ата-энелерден акча чогултуу боюнча чуу жаратып жаткан Новопавловкадагы лицейге жылына мамлекеттен 49 миллион сомго жакын каражат бөлүнөт. Бул туурасында Sputnik Кыргызстан агенттигине Билим берүү жана илим министрлигинен билдиришти.
Маалыматка ылайык, республиканын бардык жалпы билим берүү уюмдарына окуучулардын санына жараша бюджеттен каражат бөлүнөт.
Аталган лицейге 2019-жылы төмөнкүдөгүдөй сумма каралган:
- Мугалимдердин жана башка кызматкерлердин эмгек акысына — 39 миллион 155,6 миң сом;
- Социалдык фондго төлөмдөр — 6 миллион 754,3 миң сом;
- Педагогикалык кызматкерлердин квалификациясын жогорулатууга — 152,6 миң сом;
- Ар кандай чыгымдар — 47,3 миң сом;
- 1-4-класстардын окуучуларынын тамактануусуна — 2 миллион 120,2 миң сом;
- Чарбалык чыгымдар — 258,3 миң сом;
- Жалпы билим берүүчү уюмдарды оңдоодон өткөрүүгө — 340,1 миң сом.
Баарын кошуп эсептегенде 48 миллион 828,4 миң сомду түзөт.
Эскерте кетсек, ата-энелердин айрым тобу лицейде ар бир окуучудан 500-700 сомдон чогултуларына жана каражаттын сарпталышы боюнча так маалыматты ала албаганына нааразы болуп келишет. Алар фондго чогултулган акчанын кайда сарпталып жатканын билүү жана мектеп директорун кызматтан кетирүү талабы менен Ак үйдүн алдына митингге да чыгышкан.
Учурда аталган лицейди прокуратура, Финпол текшерип жатат, ал эми директор Диляра Абдуллаева убактылуу иштен четтетилген.
