БИШКЕК, 24-апр. — Sputnik. Чүйдүн Новопавловка айылындагы Чыңгыз Айтматов атындагы №1 лицейдин окуучуларынын ата-энелеринин айрымдары акча жыйноого макул экенин айтып, маалымат жыйын өткөрүштү.
Алар чогултулган каражат максаттуу пайдаланыларын, нааразы болуп жаткан ата-энелердин негизги максаты - директорду кызматтан кетирүү экенин белгилешти.
Жыйында сүйлөгөн Софья Мамбетова директор кыргыз улутунан болбогону үчүн экинчи тараптагы ата-энелер улуттар аралык ынтымакты бузуп, бөлүп жатат деп УКМКга арызданышканын билдирди.
"Бул жерде улуттар аралык маселе козголуп жатат деп Улуттук коопсуздук комитетинин Чүй облустук бөлүмүнө кайрылдык. Бирок ар кандай жүйөлөргө шылтап каралбай жатат", — деди Мамбетова.
Дагы бир эне Роза Арпачиева 500-700 сомдон акча чогултууга макул экенин айтып, ал лицейде коррупция жок деген пикирин билдирди.
Ал эми Ирина Митрошина ата-энелердин чогулушу болгондо сарпталган акчалар тууралуу маалымат алып турарын белгиледи.
"Мектепте өсүп-өнүгүүлөр болууда. Биздин акчанын эсебинен кошумча сабактар, ийримдер, спорттук секциялар өтөт. Түрдүү сынактарга, олимпиадаларга катышып жеңип келишет. Акча төлөй албаган көп балалуу, майып, аз камсыз болгон үй-бүлөнүн балдары ушунун эсебинен окуп, тамак ичет. Биздин колубузда болгон үчүн аларга жардам кылабыз", — деди Митрошина.
Эскерте кетсек, ата-энелердин айрым тобу лицейде ар бир окуучудан 500-700 сомдон чогултуларына жана каражаттын сарпталышы боюнча так маалыматты ала албаганына нааразы болуп келишет. Бүгүн, 24-апрелде, ал ата-энелер мектеп фондусуна деп чогултулган акчанын кайда сарпталып жатканын билүү жана мектеп директорун кызматтан кетирүү талабы менен митингге да чыгышты. Аталган лицейди прокуратура да текшере баштады, ал эми директор Диляра Абдуллаева убактылуу иштен четтетилген.
