ОШ, 21-мар. – Sputnik. Өзгөн районунун Ийри-Суу айылында 14 жаштагы баланын башына ок тийип, окуя болгон жерде каза болду. Бул тууралуу облустук милициянын маалымат катчысы Жеңиш Аширбаев билдирди.
Анын айтымында, каза болгон 14 жаштагы баланын 12 жаштагы иниси мылтык менен ойноп жаткан учурда атылып кетип, чачма ок кокусунан өспүрүмдүн башына тийген. Кырсык 20-март күнү саат 21:30 чамасында болгон.
"Райондук ички иштер башкармалыгына аталган окуя боюнча маалымат келип түшкөн. Ыкчам иликтөө бөлүмү барганда, иниси агасын аңчылык кылуу үчүн пайдаланылган 16-калибрдеги мылтык менен атып алгандыгы белгилүү болгон", — деди Аширбаев.
Тартип коргоо органдарынын мүчөлөрү элге кайрылып, пайдаланууга уруксаты бар курал-жаракты атайын эрежелер менен сактоону дагы бир жолу эскертет. Шалаакылык же жоопкерчиликсиз мамиле адам өмүрүнө кооптуулук жаратышы мүмкүндүгүн кошумчалашкан.
