БИШКЕК, 14-мар. — Sputnik. Кыргыз-тажик чек арасында абал салыштырмалуу туруктуу, бирок чогулган эл тарай элек. Бул тууралуу Sputnik Кыргызстан агенттигине Кыргызстандын Чек ара кызматынан билдиришти.
Эскерте кетсек, буга чейин Ак-Сай — Тамдык айланма жолдун курулушунан Баткен районунун Ак-Сай айылы менен Тажикстандын Меxнатабад айылынын тургундары ортосунда чыр чыккан.
Эки өлкөнүн тышкы иштер министрлери кырдаалды жөнгө салуу боюнча телефон аркылуу сүйлөшкөн.
Маалыматка караганда, чогулгандардын саны улам-улам өзгөрүп жатат. Орто эсеп менен алганда кыргыз тарапта 100дөй, тажик тарапта 50-70 киши турат.
"Күч органдары абалды жөнгө салып, түшүндүрүү иштерин жүргүзүп жатат. Чогулган эл тарай элек, бирок кагылышуулар жок", — деп айтылат ведомствонун билдирүүсүндө.
Жеринде чек арачылар сүйлөшүүлөрдү жүргүзүп, Баткен жана Согди облустарынын жетекчилеринин диалогу күтүлүп жатат.
