БИШКЕК, 12-мар. — Sputnik. "Кыргыз почтасы" мамлекеттик ишканасынан алардын бөлүмүнөн айып пулдун акчасы толугу менен гана кабыл алынары туурасындагы жарыя эмнеге илингендигин түшүндүрүп беришти.
Буга чейин Facebook социалдык тармагындагы топтордун бирине маалымат чыккан. Анда ЖМКлар аркылуу айып пулдун 50 пайызын гана төлөйт деген маалымат боюнча документке азырынча кол коюла электиги айтылган.
"Андыктан кассадагы операторлор айыптын толук суммасын гана кабыл алат. Муну түшүнүү менен кабыл алыңыздар. Администрация", — деп жазылган.
Тиешелүү мыйзамга киргизилген өзгөртүү 4-марттан тарта иштей баштаган. Социалдык тармактагылар почта кызматкерлеринин эгерде 15 күндө төлөсө айып пулдун жарымына жеңилдик берилерин билбегендигине нааразы болушкан.
"Кыргыз почтасы" мамлекеттик ишканасынын маалымат кызматынан аталган жарыя Ибраимов көчөсүндөгү 21-бөлүмдө илингенин айтышты.
"Коопсуз шаар" долбоору 12-февралда ишке кирген. Жол эрежесин бузгандарды сүрөткө, видеого тартып, жазып калуу үчүн Бишкектин көчөлөрүнүн 10 кесилишине жана шаар сыртындагы 17 жерге камера орнотулган. Эреже бузган айдоочуларга айып каттары келе баштады. Бүгүн, 12-мартта, Бишкектин тогуз жеринде камера иштеп баштамак, бирок техникалык себептерден улам аларды ишке киргизүү кийинки мөөнөткө калтырылды.
