БИШКЕК, 4-мар. — Sputnik. Премьер-министр Мухаммедкалый Абылгазиев ЖИА бизнес-ассоциациясынын мүчөлөрү менен жолугушуп жатканда мамлекет бизнестен көз каранды экенин моюнга алуу керектигин айтты. Бул туурасында өкмөттүн маалымат кызматынан кабарлашты.
"Мамлекет бизнестен көз каранды экенин моюнга алуу керек, себеби анын натыйжалуу ишинен көптөгөн социалдык маселелердин чечилиши көз каранды. Өкмөт бизнес-коомчулук менен биргеликте бизнес жүргүзүүгө ыңгайлуу шарттарды түзүүнүн жана ишкер чөйрөнү жакшыртуунун үстүндө иштөөнү улантат. Өкмөт тарабынан Ишкерлик кодексин иштеп чыгуу иштери башталды", — деди Абылгазиев.
"Биз легалдуу бизнес саясатын жүргүзүп жатпайбызбы. Жолугушууга силердин күнүмдүк көйгөйлөрүңөр тууралуу угуу үчүн, диалог түзүү максатында келдим. Мен кооз сүйлөгөндү жактырбайм, жөн гана иштеш керек", — деген премьер-министр.
Жолугушууда Абылгазиев учурда мамлекеттик сатып алууларды жүргүзүүдө атамекендик товарлардын жана кызмат көрсөтүүлөрдүн үлүшүн көбөйтүү маселеси иштелип жаткандыгын айткан.
"Бүгүнкү күнү мамлекеттик сатып алуулардын басымдуу бөлүгү — биздин өлкөгө импорттолгон товарлар. Азыркы тапта, эгерде окшошу болсо, биз атамекендик өндүрүштөгү товарларды сатып алууга басым жасоого тийишпиз. Мындан тышкары, эскерте кетсем, өкмөт тарабынан ишкерлик субъектилерди текшерүүгө 2 жылдык мөөнөткө мораторий киргизилди. Бул кадам мамлекеттик органдарды бизнес менен өз ара кызматташуусунун кыйла заманбап ыкмаларына өтүүгө өбөлгөлөйт", — деген Абылгазиев.
Жолугушуу суроо-жооп иретинде уланып, анда бизнес-ассоциация мүчөлөрү бизнес жүргүзүүдөгү көйгөйлөр тууралуу айтып берип жана өздөрүн кызыктырган суроолорду узаткан. Анын ичинде аларды курулуш ченемдери, салыктык чегерүүлөр, кен иштетүү, мүмкүн болгон мамлекеттик-жеке өнөктөштүк долбоорлору, айыл чарбасына жана башка маселелер болгон.
