БИШКЕК, 25-дек. — Sputnik. Футбол боюнча Кыргызстандын курама командасы Катардын оюнчулары менен беттеше турганын КР Футбол федерациясынан билдиришти.
Оюн Катарда шейшемби күнү Бишкек убактысы боюнча саат 23:00дө өтөт. Командалардын өз ара келишүүсү боюнча беттешке күйөрмандар киргизилбейт.
Буга чейин Кыргызстан менен Иорданиянын оюнчулары ушундай эле шартта беттешип, кыргызстандыктар 1:0 эсебинде жеңишке жеткен.
Учурда Кыргызстандын курама командасы Александр Крестининдин жетекчилиги алдында Азия кубогуна даярдык көрүү үчүн машыгууларын өткөрүүдө. Кыргызстандык оюнчулар аталган кубокко биринчи жолу катышмакчы.
Азия кубогу 2019-жылы 5-январда Бириккен Араб Эмирлигинде өтөт. Кыргызстандын командасы С тайпасына түшүп, Түштүк Кореянын курамасы (7-январь, Аль-Айн), Кытай (11-январь, Аль-Айн) жана Филиппиндер менен (16-январь, Дубай) ойнойт.
