Баткендеги Капиталдык курулуш башкармалыгынын кызматкерлерине иш козголду

БИШКЕК, 21-дек. — Sputnik. Баткен облустук Капиталдык курулуш башкармалыгында кызмат абалынан кыянаттык менен пайдалануу фактылары аныкталды. Бул тууралуу Улуттук коопсуздук мамлекеттик комитетинин маалымат кызматы билдирди.

Ага ылайык, УКМКнын Коррупцияга каршы күрөшүү кызматы тарабынан өткөрүлгөн ыкчам издөө иш-чараларынын алкагында Баткен облустук Мамэкотехинспекциясынын аймактык башкаруу жана капиталдык курулуш башкармалыгынын жооптуу адамдарынын кызмат абалынан кыянаттык менен пайдалануу фактылары текшерүүнүн жүрүшүндө аныкталган.

"Такталгандай, Баткен шаардык аймактык ветеринардык лабораториясынын жана Баткен районундагы 3 орто мектебин курууда жана ишке киргизүүдө куруу иштерин жогорулатылган баада кургандыгы такталды", — деп айтылат маалыматта.

Бул факт боюнча облустук прокуратура КР Кылмыш-жаза кодексинин 171-беренеси ("Ишенип берилген мүлктү ыйгарып алуу же төлөмөр болуу"), 221-беренеси ("Коммерциялык же башка уюмдардын кызматчыларынын ыйгарым укуктарын кыянаттык менен пайдаланышы") жана 315-беренеси ("Кызматтык жасалмачылык") боюнча кылмыш иши козгоду.

Учурда тергөө иштери жүрүп жатат.