БИШКЕК, 9-ноя. — Sputnik. Ат-Башы районунда 8-ноябрь күнү Нарын облусунун жаштарынын "Ынтымак курултайы-2018" иш-чарасы болуп өттү. Бул тууралуу Ат-Башы айылдык кеңештин төрөгасы Туратбек Ыдырысов билдирди.
Анын айтымында, курултайдын башкы максаты — демилгелүү жаштардын башын бириктирип, Нарын облусунун социалдык жана экономикалык өнүгүшү үчүн биргеликте иш алып баруу.
"Жаштардын курултайына облустун беш районунан 170тен ашуун жаштар келип катышты. Мындай иш-чара Нарында биринчи ирет болуп жатат. Биздин максат Нарын облусунун жаштарынын башын бириктирип облустун өнүгүшүнө чогуу салым кошуу болуп саналат", — деди төрөга.
Белгилей кетсек, бул курултайга Нарын облусунун ыйгарым укуктуу өкүлү Аманбай Кайыпов да катышып, иш-чаранын журүшүндө алдыңкы жаштарга сыйлык тапшырды.
