БИШКЕК, 10-окт. — Sputnik. Аламүдүн районуна караштуу Пригородное айылындагы мектепке кошумча корпус салууга Ветеринария жана фитосанитария коопсуздугу боюнча мамлекеттик инспекция уруксат берди. Бул тууралуу Sputnik Кыргызстан агенттигинин кабарчысына аталган инспекциясынын жетекчиси Калысбек Жумаканов билдирди.
Эске салсак, буга чейин Sputnik агенттиги аталган айылдагы жападан жалгыз мектепке бала батпай коридор, кампада окуп жаткандыгы тууралуу материал жасаган.
Анда жетекчилик мектепке кошумча корпус салууга жанында эле жер аянты, каржы булагы бар экенин айтып, болгону Ветеринария жана фитосанитария коопсуздугу боюнча мамлекеттик инспекция айылдын үч жеринде күйдүргүнүн очогу бар деп уруксат бербей жатканын айткан. Кабарчылар барып окуянын чоо-жайы менен таанышып, курулушка уруксат берилбей жатканы менен күйдүргү очогунун так түбүндө артезиан скважинасы, балык фермасы иштеп жатканына күбө болгон.
Бул маселе менен кабарчылар аталган инспекциясы менен байланышып, мекеменин жетекчиси маселе бир айдын ичинде чечилип каларын убадалаган.
"Күйдүргүнүн очогу бул айылга 1960-жылдары эле табылыптыр. Андан бери ал жакта көптөгөн курулуш болуп эч кандай коркунуч байкалган эмес. Айылдагы топурактын 10 жылдан берки лабораториялык изилдөөлөрүн карап чыксак баары таза чыгып, кошумча корпус курууга уруксат бердик. Мектептин аймагына курулуш баштоого коркунуч жок экен. Анын үстүнө билим берүү жайы күйдүргү очогунан 500 метр алыстыкта жайгашкан", — деди Жумаканов.
Эске салсак, аталган айыл өкмөтүнүн башчысы Сактанбек Паязов мыйзам боюнча санитардык-коргоо зонасы күйдүргүнүн очогунан миң метр алыстыкта болушу керек деп жазылып турганын айткан.
