БИШКЕК, 10-июл. — Sputnik. Кыргызстандын президенти Сооронбай Жээнбековдун маалымат кызматы Түркия лидери Режеп Эрдогандын инаугурациясынан алынган кадрларды жарыялады.
Эрдоган 9-июлда ант берип, президенттик ишке киришти.
Эрдогандын ант берип жатканын чакырылган коноктор туруп угушту. Резиденцияда болгон инаугурацияга 5000ге чукул коноктор катышты. Алардын арасында 21 мамлекеттин башчылары, 28 өлкөнүн премьер-министрлери, депутаттары болду.
Жээнбеков Анкарага инаугурацияга катышуу үчүн кечээ, 9-июлда, учуп кеткен.
Эске салсак, Түркияда 24-июнда өткөн президенттик шайлоодо мурдагы мамлекет башчы Тайип Эрдоган 52,59 пайыз добуш алып, жеңишке жеткен. Аны менен катар эле парламенттик да шайлоо болгон. Эми Түркия парламенттиктен башкаруунун президенттик формасына өттү. Муну жалпы эл 2017-жылдын апрелинде өткөн референдумда колдогон.
