Ал жылы режиссер Океев "Алтын күз" тасмасын тарта баштаган. Сценарийин Мар Байжиев жазса, башкы ролду казакстандык актер Жолжаксынов ойногон.
Аталган фильмде образ жараткан КР эл артисти Жамал Сейдакматова ошол учурду мындайча эскерет:
"Алтын күз" Фрунзе, Алматы шаарында тартылып, ага кыргызстандык, казакстандык актерлер катышкан. Анда журналисттин ролун казак Досхан Жолжаксынов аткарган. Төлөмүш Океев анын актердук чеберчилигин баалачу, тасмаларына көп чакырып турган. Андан сырткары, бул тасмага кыргыз элинин каймактары да тартылган. Алсак, Болот Миңжылкыев, Аалы Токомбаев, Түгөлбай Сыдыкбеков, Мамбет Мамакеев да роль жараткан жайы бар. Ал эми сценарийин Мар Байжиев жазып, фильмди тартуу иштери беш айда соңуна чыккан. Ошол маалда режиссер Төлөмүш Океевдин атагы алыска кетип, жылдызы жанып турган кез эле. Себеби ал инсандын тарткан эмгектеринин ар бир эпизоду сүйлөп турчу", — деди Сейдакматова.
Фильм 1981-жылы көрүүчүлөргө сунушталып, бир катар эл аралык фестивалдарга катышкан.
