Бирөөгө зар, бирөөгө кор бала. 6-7 жылдан бери төрөй албай жүргөн аяшым бар. Көрүнбөгөн дарыгери, ал тургай көз ачыгы калбады. Жолдошу экөө "балдар үйүнөн ымыркай асырап алсакпы" деп да ойлонуп, караштырып жүрүштү. Бирок дени сак бала таба албай коюшту. Азыр алардын күндө Кудайдан зар какшап тилегени — бала.
Бирок коомубузда бала баркын билбей жектеп, кордогон ата-энелер да көбөйдү. Өткөндө Ошто бир эне сөрөй баласын депкир менен сабап өлтүргөн эле, эми Балыкчыда токмоктолгон наристе ооруканага түштү.
Баарыбызда бала бар. Тентек кылышат, тил албайт. Бирок аны сөзсүз көгала койдой сабоо керек эмес да. Жин келип, кан кайнап жатса бир колдун ачуусун бир кол менен басып сабырдуу бололу. Кокус талуу жерине катуу чаап алсаңызчы…
Милиция бөлүмүндө киши колдуу болгон кыздын окуясын угуп канча кейидик. Кылмышкердин колуна кандуу бычак кантип тийгенин милиция айтып берди.
Саясаттын казаны учурда боркулдап кайнап жаткан кези. Кечээ мурдагы премьер-министр Сапар Исаковду УКМК үчүнчү жолу суракка чакырып, ага карата "коррупция" беренеси боюнча айып такты. Ошондой эле эч жакка кетпөө жөнүндө баш коргоо чарасы тандалды.
Бул боюнча Исаков "экс-президент Атамбаев экөөбүздү каралоо жүрүп жатат" деп сындап, Кыргызстандан эч жакка кетпей турганын айтты. Ошондой эле ага карата айыптоолорго нааразы экенин билдирди.
Ал ортодо мэрияда шаардык кеңештин жыйыны өтүп, мэр Албек Ибраимов агынан жарылды. Ошондой эле вице-мэр Айгүл Рыскулова кызматтан кетти.
Премьер-министр Абылгазиев болсо, Бишкектеги жолдордун оңдолушун текшерди. Өкмөт башчынын маалымат кызматы жөнөткөн сүрөткө баам салсак, Абылгазиев Чыңгыз Айтматов проспектисиндеги Семетей жана Масалиев көчөлөрүнүн кесилишиндеги жол тилкесин карап чыккан. Аткаминерлер койкойгон жолду текшеришпей, эптеп салынган жолдорду көрүшсө болмок экен.
Муфтият Кадыр түн качан болоорун айтты. Ыйык Рамазан айында чукушпай, урушпай сабырдуу, кечиримдүү бололу.
Валюта наркы. Сомдун баасы долларга карата орто эсеп менен 68.33 (сатып алуу) жана 68.59 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 42.80 сом, АИ-95 үлгүсүндөгү бензин 45.50 сом, ал эми дизель майы 43.80 сомдон сатылууда.
Соңку сөз. Жакшы болуш аста-аста, жаман болуш бир паста!
Сабырдуулук каалап, Таалайгүл Усенбаева
