БИШКЕК, 3-май — Sputnik. Президент Сооронбай Жээнбеков бүгүн, 3-майда Ысык-Көл облусундагы Тоң районунун жашоочулары менен болгон жолугушууда элди түндүк, түштүккө түштүккө бөлүп жаткандарга чара көрүлөрүн айтты. Бул тууралуу мамлекет башчынын маалымат кызматы билдирди.
Президент кийинки кезде "Жээнбеков кландык бийликти орноткону жатат" деген пикирди коомго сиңирүү аракеттери күчөп жатканын белгиледи.
"Ыгы келсе да, келбесе да чагымчыл максатта "түндүк-түштүк" маселесин көтөрүп жаткан топтор бар. "Түндүк-түштүк" маселесин таңуулап жаткандарды — кутман элибизди ичтен иритип, өзүнүн бузуку саясатын жүргүзгүсү келгендер деп баалайм! "Түндүк-түштүк" маселесин жабыштырып, жок жерден таңуулап жаткандарга чара көрүлөт!", — деди Жээнбеков.
"Бул менин Кудай буюрган, элим ишенип тапшырган негизги вазийпам! Үй-бүлөлүк бийлик кандай болоорун элибиз бир эмес, эки президенттин тушунда көргөн. Үй-бүлөлүк-кландык башкаруунун трагедиялуу тарыхы Кыргызстан калкынын аң-сезиминде өчпөс так калтырды жана элибиз кландык башкарууга кайрадан жол бербейт!", — деп билдирди президент.
Белгилей кетсек, Жээнбеков эки күндүк жумушчу сапары менен Ысык-Көл облусуна барып, анын ичинде Тоң районунун жашоочулары менен жолугушууда.
