БИШКЕК, 7-фев. — Sputnik. Интернет айдыңында милиция кызматкери белгисиз үлгүдөгү жүк ташуучу унааны токтотуп, айдоочу эмне жүктөп бара жатканына кызыккан видео тарады.
Айдоочу кык жүктөп баратканын айтып, эмне себептен укук коргоочунун төш белгиси жок экенин сураган. Милиционер болсо жаңы кызматкер болгондуктан азырынча төш белги ала электигин, бирок күбөлүгүн көрсөтө аларын билдирген.
Жол кыймылы коопсуздугун камсыздоо башкы башкармалыгы (ЖККББ) аталган видео эски экенин билдирүү менен учурда кайда тартылганы жана айдоочу эмне себептен токтотулганын тактоо үчүн иштер жүрүп жатканын билдиришти.
Буга чейин ЖККББнын жетекчи орун басары Ыманалы Саркулов милиция кызматкерлерин сүрөт жана видеого тартып, жалпыга маалымдоо каражаттарына жарыялоого мыйзам чегинде тыюу салынарын айткан. Бирок Башкы прокуратура анын кебин четке кагып, эскертүү берди.
