БИШКЕК, 17-янв. — Sputnik. Ысык-Көл районунун хатибияты тарабынан кайрымдуулук уюштурулуп, Григорьевка айылынын тургуну, оор абалда төшөктө жаткан 8 баланын атасына бир тонна көмүр түшүрүп берилди. Бул тууралуу муфтияттын маалымат кызматы билдирди.
Ошондой эле айылдагы муктаж адамдарга 22 кап буудай жана 3 кой таратылган.
Андан сырткары, Балыкчы шаарында кайрымдуулук фонду жана жергиликтүү уюм шаардык хатибият менен биргеликте 5 балага жаңы кийим-кече алып берип, 15 үй-бүлөнү көмүр менен камсыздаган.
Ушундай эле кайрымдуулук иши Баткен шаарында өтүп, 20 жакыр үй-бүлөнүн ар бирине 10 каптан көмүр берилди. Келе албаган айрым үй-бүлөлөргө жардамды жеткирип беришкен.
