БИШКЕК, 26-дек. — Sputnik. Бишкек шаарынын тургундары курулуш таштандыларын тиричилик акыр-чикирин ыргытчу контейнерге салышат. Бул тууралуу "Тазалык" муниципалдык ишканасынын маалымат катчысы Жибек Каракеева Sputnik Кыргызстан агенттигине билдирди.
Анын айтымында, шаардыктар контейнерлерге бетондун калдыктарын, цемент, таш, кафель сыяктуу таштандыларды салып салышат.
"Анын айынан таштанды ташыган техника керектен чыгууда. Мындай нерсе такай шаардын бардык аймагында болуп турат. Курулуш таштандыларын атайын жайга алып барып таштагыла, көптөн-көп суранабыз. Эреже бузгандарга келип мындай кылбоо керектигин айтсаң ары карап басып кетишет", — деди Каракеева.
Мэриянын санитардык-экологиялык инспекциясынын жетекчи орун басары Арсен Айылчиев эреже бузгандарга айып салынарын кошумчалады.
"Курулуш таштандысын каалаган жерге таштаган тургундарга 2 миң сом, юридикалык тарапка 10 миң сом айып салынат. Эгер юридикалык жак эреже бузууну кайталаса айып пул 20 миң сомго чейин чыгат", — деди Айылчиев.
Эгер ушундай эреже бузууга күбө болсоңуздар мэриянын ыкчам кызматынын 185 номерине, же санитардык-экологиялык инспекциясынын 65-81-59 номерине чалсаңыздар болот.
