БИШКЕК, 16-ноя. — Sputnik. Бишкек шаарында декабрь айынан тарта кургак учукка каршы оорукананын курулушу башталарын Саламаттык сактоо министрлигинин маалымат кызматынан билдиришти.
Учурда имарат салынчу аймакты даярдоо иштери жүрүп жатканын Улуттук фтизиатрия борборунун директору Абдуллаат Кадыров маалымдады.
"120 орундуу жаңы оорукана Немец өнүгүү банкы тарабынан бөлүнгөн 8,5 миллион еврого курулмакчы. Ошол эле жерде оор формадагы бейтаптар дарыланчу 50 орундуу бөлүм иштейт", — деп айтылат билдирүүдө.
Аталган жай инфекциялык көзөмөл жагынан алганда Кыргызстанда дүйнөлүк стандарттарга жооп берген биринчи оорукана болмокчу.
Маалыматка караганда учурда Элебесов көчөсүндө жайгашкан эки кабаттуу оорукана бузулуп, жаңы имарат анын ордуна салынмакчы. Бейтаптардын дарылоосу үзгүлтүккө учуратпоо үчүн алар башка ооруканаларга бөлүштүрүлөт.
