БИШКЕК, 10-ноя. — Sputnik. Кыргызстан мусулмандарынын муфтийи Максатбек ажы Токтомушев облус жана шаар казыларынын бир жылда аткарган иштери жана өлкөдөгү диний кырдаал боюнча отчетун алып, алардын ишмердүүлүгүнө баа берди. Бул тууралуу муфтияттын маалымат кызматы билдирди.
Бул жыйынга Кыргызстан мусулмандары дин башкармалыгынын бөлүм башчылары жана муфтийдин орун басарлары катышып, аймактагы жүргүзүлгөн иштер, берилген тапшырмалардын аткарылышын анализдеп, облус казыларына сунуш-пикирлерин айтышты.
"Муфтий өлкөнүн стабилдүүлүгү бардыгынан маанилүү экендигин баса белгилеп, терс диний агымдардын алдын алууда коомчулук арасында түшүндүрүү иштерин күчөтүү зарылдыгын белгиледи", — деп айтылат маалыматта.
Андан сырткары, республика аймагындагы мечиттердеги бирдиктүү жума хутбаларын тартипке келтирүү боюнча тапшырма берип, ажылыкты жогорку деңгээлде уюштургандыгы үчүн облус казыларына ыраазычылыгын билдирди.
