БИШКЕК, 26-окт. — Sputnik. Мумия тарых музейинин экспонаттар тизмесинен чыгарылган үчүн көмүлдү. Бул тууралуу мумия маселеси боюнча Жогорку Кеңеш тарабынан түзүлгөн атайын жумушчу топтун жыйынында Маданият, маалымат жана туризм министрлигинин статс-катчысы Бакыт Секимов билдирди.
Анын айтымында, мумия экспонат катары тизмеден чыккандан кийин аны көмүүгө туура келген.
"Экспонатты сактоого болбой калды делген музей жетекчилигинин кайрылуусунан кийин атайын комиссия түзүлгөн. Андан соң Улуттук илимдер академиясынын жетекчиси баш болуп, министрликтерге чейин аны тарых музейиндеги экспонаттардын катарынан чийип салуу чечимине кол коюп беришкен. Тизмеден чийилгенден кийин бул мумияны ыргытып же көчөгө таштап салмак белек. Көз ачыктар да "бизге бергиле" деп жанды койбогондуктан алып барып көмдүк", — деди Секимов.
Ал эми Улуттук илимдер академиясынын жетекчисинин милдетин аткаруучу Мурат Жуматаев мумияны тизмеден гана чыгарып салууга кол коюп бергенин айтып, тез аранын ичинде көмүлүп каларын билбегенин билдирди.
Жыйынга катышып жаткан археолог, тарыхчы, коомдук ишмерлер аны тезирээк кайра казып алып Илимдер академиясына өткөрүп берүү керектигин айтышты. Маселе ачык бойдон калып, депутаттар түзүлгөн протоколдорго карата жыйынтык чыгармай болушту.
Эскерте кетсек, 14-октябрда Баткен облусунун Кара-Булак айылындагы Мактым-Гөр деген жерге IV-V кылымдарга таандык делген мумия жерге берилген.
Ал 1960-жылдан бери борбордук тарых музейинде сакталып келген.
