БИШКЕК, 23-окт. — Sputnik. Бүгүн Жогорку Кеңештин социалдык маселелер, билим берүү, илим, маданият жана саламаттык сактоо боюнча комитетинде мумия чыры боюнча маселе каралып, аны кайрадан иликтеп чыгуу үчүн комиссия түзүлмөй болду.
ЖК депутаты Рыскелди Момбековдун айтымында, түзүлгөн топ эки жума бою мумиянын илим үчүн канчалык баалуу экенин иликтейт.
"Комиссиянын чечими менен гана мумиянын көмүлгөн жерде калары же казылып алынары белгилүү болот", — деди депутат.
Жыйынга министр Казаков ден соолугуна байланыштуу келбей калгандыктан, анын ордуна министрликтин статс-катчысы Бактыбек Секимов катышты.
Эскерте кетсек, 14-октябрда Баткен облусунун Кара-Булак айылындагы Мактым-Гөр деген жерге IV-V кылымдарга таандык делген мумия жерге берилген.
Ал 1960-жылдан бери борбордук тарых музейинде сакталып келген.
